La Fera di Oh Bèi Oh Bèi: pararia che bisògna tornà indree fin al 1510.
El Papa Pio IV el manda a Milan on sò Gran Maèster, on cèrto Giannetto Castiglioni con l’incarich de dessedà on poo i milanes, dagh ona bèlla scorlida e fagh tornà la voeuja de la devozion e de la fed vèrs i Sant.
Quand el Giannetto l’è rivaa in città el gh’aveva el timor de vèss nò ricevuu con benevolenza da part di milanes che mai aveven dà sègn de simpatia in di confront del Papa. Oltratutt l’era pròppi el 7 de dicember, el dì de Sant Ambroeus e inscì l’ha preparaa tanti pacchètt con denter bombon e bellee.
Ona vòlta rivaa in città, quèi del sò seguit hann taccaa a dà via ‘sti pacchètt ai fiolitt che intrattant aveven faa calca intorna al corteo e insèma a lor on gran numer de gent. El Corteo l’è rivaa infin a la Basilica de Sant Ambroeus con tutta la gent che faseva fèsta.
Da quèll dì lì, tutt’i ann, quand riva el dì del nòster Sant, se organizza la fera. Vègnen miss in pee banchètt de vestii, bombon, bellee, mostarda, gnaccia e firon.
De princippi la fera la se tegneva in Piazza di Mercant, poeu dal 1886 intorna a la Basilica de Sant Ambroeus, ma dòpo 120 ann, in del 2006 l’hann spostada intorna al Castèll Sforzèsch doe la ven organizzada anmò incoei.
Ma perché la “Fera” la se ciama di “Oh bèi, oh bèi”?
Beh, l’è facil de capì: el nòmm el deriva da l’escamazion di bagai che quand hann vist el corteo del Giannetti e soramaròss quand hann cominciaa a dervì i pacchètt e hann vist bombon e bellee s’hinn miss a vosà “Oh bèi, oh bèi!”