lettera
lettera

Cara el mè Ceser,

te scrivi sti pòcch righètt inscì t’el see che t’ho scritt. Se te ricevet quèsta lèttera, voeur dì che l’è rivada, se te la ricevet nò fammel savè che te ne mandi on’altra. Scrivi pianin pianin perchè soo che te see bon nò de leg a la svèlta. On poo de temp fa, tò pader l’ha leggiuu in sul giornal che la maggior part di incident stradai succeden in d’on ragg de on chilòmetro da l’abitazion, inscì èmm decis de traslocà  on poo pussee lontan. La cà noeuva l’è meravigliosa, gh’è anca la lavatris ma son nò segura se la fonziona. Pròppi ier gh’hoo miss dendet la bugada, hoo tiraa la còrda e la bugada l’è sparida completament. Chì el temp l’è nò tròpp brutt, settimana passada l’ha piovuu dò vòlt: la prima vòlta per trii dì, la seconda vòlta per quatter. Voeuri anca ditt che tò pader l’ha troaa on laorà noeuv: adèss el gh’ha sòtta 500 persònn, de fatt el taja l’èrba al cimiteri. A propòsit de la giacca che te m’avevet domandaa, el tò zio Piero el m’ha dii che spedilla cont i bottoni saria costaa tròpp (per via del pés di bottoni) allora j hoo staccaa. Se te penset de taccai de noeuv, guarda che ti hoo miss in la saccòccia intèrna. Tò fradèll Gianni l’ha faa ona gran stuppidada con l’otomobil: l’è andaa giò da la vettura, l’ha sbattuu la portera e senza incòrges l’ha lassaa denter i ciav; allora l’ha dovuu andà sù in cà a toeu el crick per spaccà el veder inscì èmm poduu vegnì foeura anca numm. Se te vedet la Margherita saludala de part mia e se te la vedet nò digh nient. Adèss te saludi perché gh’hoo de corr a l’ospedal, la toa sorèlla la gh’ha de partorì ma savèmm nonanmò s’el sarà on mas’cètt ò ‘na tosètta e per quèst poeudi nò ditt se te saree zio ò zia. Te brasci-sù fòrt fòrt e on basin da la toa mama che la te voeur ben.

P.S. Vorevi mèttet denter anca on poo de danee, ma avevi giamò sarà-sù la busta.

Mama Adalgisa.

 

PARTECIPA ANCHE TU ALLA GIORNATA DEL DIALETTO MILANESE 2017. Clicca qui