Ingredient
7 oeuv intregh
2 ross de l’oeuv
300 gr de farina
100 gr de butter
1 bustina de vanillina
1 ciccinin de saa
½ bustina de levaa per dolz
100 gr de zuccher
¼ de latt
La pèll de limon grattada
1 lt de òli de melgon
Comincèmm col mètt in d’ona cazziroeula el latt, la vanillina, el zuccher, la pèll de limon grattada, on ciccinin de saa, el butter e rugà ben ben e quand el latt el tacca a buì giontigh la farina e el levaa, che avevon in precedenza mes’ciaa insèma, smorzèmm el foeugh e impastèmm polito cont on “mini-pimer”.
Quand l’impast l’è omogèni pizzèmm anmò el foeugh con la fiamma bassa e poeu andèmm avanti a rugà fin quand in sul fond de la cazziroeula se forma ona spece de patina bianca, quèst l’è el segnal ch’el nòster impast l’è pront.
Adèss occor giontagh prima i duu ross de oeuv e poeu a vun, a vun i sètt oeuv; lassèmm sfregì on moment l’impast e intanta preparom a part ona padèlla con denter l’òli; quand quèst el sarà sui 160 gradi, mettèmm in de l’òli mèzz cuggiaa a la vòlta de impast.
Cerchèmm de fann ses ò sètt a la vòlta e ògni tant girèmm cont on cuggiaa de lègn i tortèi in de l’òli. Quand hinn ben indoraa ciappon el cazzuu quèll cont i bus e tirom foeura da l’òli i tortèi che mettarèmm a sugà su on foeuj de carta de cusina. Intrattant in ona terrina, indoe avrèmm mettuu del zuccher, ghe fasèmm pirlà denter i tortèi, ècco adèss hinn bèi cald e pront de mangià.
Bon appetitt.