risotto alla milanese
risotto alla milanese

Ingredient per 4 persònn

400 gramm de ris (Carnaròli)
75 gramm de parmigian grattaa
100 gramm de butter
1 liter e ½ de broeud de carna
Ona bèlla scigolla
50 gramm de midolla de boeu
Ona vintènna de barbis de zaffran

Comincia cont el preparà in d’ona tazzina i barbis de zaffran e vèrsegh a sora on poo de broeud (minga tròpp) bèll sbrojent.

Taja-giò fin, fin la scigolla, mèttela in d’ona cazziroeula con 50 gramm de butter ,la midolla de boeu tajada a tocchèi e lassa rosolà a foeugh bass per on quart d’ora.
Adèss giontegh el ris e fal insaorì on moment cont el rugà tusscòss cont on cuggiaa de lègn.

Giontegh on cazzuu de broeud bèll sbrojent, alza el foeugh e messeda semper senza mai fermass e man, man giontegh, quand l’è necessari, alter broeud (semper sbrojent) in manera de mai lassà sugà el risòtt.

Quand el ris el sarà quasi còtt occor passà cont on colin i barbis de zaffran che prima avevom lassaa a moeuj in del broeud, per quèst occor schiscià cont on cuggiarin de caffè i barbis e giontà el liquid ottegnuu al risòtt e lassà fenì la cottura.

Prima de mètt in tavola el risòtt occor giontagh el butter che gh’era vanzaa e el parmigian grattaa e rugà ben, ben tusscòss per mantecà.

Quand el risòtt el sarà impiattaa, mettegh de soravia anmò ona bèlla sbroffada de formagg grattaa.

Bon appetitt!