On ciceron improvvisaa

Più letti

On turista, ch’el voeur vedè Milan,
inscì, per andà a spass ò per dilètt,
con la guida ò la cartina in man,
sta pur sicur che in Dòmm el va dirètt.
Lor creden che Milan el sia tutt lì,
tutt al pù quatter pass in Galleria
la Scala, via Manzon per poeu finì,
stracch mort, con mal ai pee, in birreria.
Incontri ‘na coppiètta in via Pontacc
che la me fa: “ Indue l’è piazza del Dòmm?”
eren turisti, l’hoo capii dai facc,
duu pacciaròtt bèi tond tant ‘me duu pòmm.
Ghe foo sègn de vegnì insèma a mì,
doevi giust andà a l’Arengari,
me guarden con dò facc on poo stranii
e poeu lòtt, lòtt, tacchèmm l’itinerari.
E car turista, ‘dèss t’el foo ved mì;
Milan l’è confusion, l’è pien de gent:
“Bisògna fatturà!” se dis inscì
ma lassèm pèrd el Dòmm per on moment,
vegnì in piazza del Carmin, guardee lì!
L’era ‘l tramont el sô el sbatteva adòss
i duu sbaratten i oeugg come inlocchii
e senten on sgrisor ch’el va in di òss.
Inforcom via del Carmin, lì a la prima
vèmm giò per via Ciovass e via Melon:
on gran silenzi… quèst l’è pròppi el clima
d’ona Milan sparida per de bon.
I strad lastraa con doppia careggiada
per i carròzz di sciori che lì passava,
e tutt el rèst faa ‘nmò con la rizzada,
e i duu meravigliaa!… Nessun fiadava.
Vedevi in sui sò facc soddisfazion
nel rimirà Milan d’on altra era,
seri content, provavi on’emozion…
e inscì, lòtt, lòtt, ècco sèmm in Brera.
Je foo voltà a manzina e avanti on tòcch
t’el lì el porton d’entrada in la Braidensa:
cerchi de famm capì dai duu farlòcch
ghe cunti, senza ‘vègh ona dispensa,
che denter lì gh’è l’arte , la cultura,
tutt quèll che i nòst artista hann lassaa lì
e numm èmm conservaa con tanta cura
per poeu mostraghi a quèi che vègnen chì.
Quèst l’è on Milan on poo particolar
che on meneghin, magari on poo sfacciaa,
v’ha faa vedè in manera singolar.
‘me ‘l fuss on cicceron improvvisaa.
“Bòna giornata, e quand avii finii,
per andà in Dòmm, se va tutt drizz de lì !”
brera
brera

Ultime

Incoronazione di spine, il mistero di Pasqua

Sono alla Pinacoteca Ambrosiana, nell'ambiente suggestivo dell'"Aula Leonardi": qui spicca un affresco di grande impatto, realizzato da Bernardino Luini,...

Potrebbe interessarti