fbpx

Filastròcca per el Natale del 2020

Più letti

Car amis, in ‘sti dì chì
mì soo nò, soo pù ‘se dì,
sarà el virus, la tension,
mì gh’hoo on gropp, a gh’hoo ‘n magon…
che se disi nò tusscòss
a me s’ciòppa fin el gòss.

Prima disen de stà in cà,
l’è tutt ross, tutt l’è saraa,
poeu però gh’hinn j’eccezion,
m’avii ròtt on poo i cojon,
se po’ nò ògni trii dì
cascià foeura on DPC.

Hoo segnaa sul calendari
tutt’i regol necessari
ch’hann miss quèi de la “Consulta”
per podè schivà la multa.

Beh, se dis che a carneval
ògni schèrz che fann el val,
si, gh’èmm tucc la mascherina
ma l’è nò de Colombina,
d’Arlecchin ò Pantalon,
Pulcinella ò Ballanzon,
numm ghe l’èmm de protezion!

Che casin , che confusion!
Prima i banch cont i rodèi,
poeu i siringh, quèi pussee bèi,
“costen tròpp!”, quanti danee
trà in del ruff ‘me fuss palpee!

S’èmm de dì di Sovvenzion,
de la Cassa Integrazion,
del Ristòro e che soo mì?
Novità gh’hinn tutt’i dì.

Parlèmm nò de pandemia,
d’ospedal, gent in corsia,
manchen lètt e infermer
i dottor e i lettigher.
Per troà la terapia?…
Mèj dì-sù on’Ave Maria!
Hann trà in pee el Citièss …
Tutt danee trà là in del cèss!

‘Dèss però la pianti chì,
sont in cà da tanti dì:
per schivà ona bronchite
hoo ciappaa ‘na bèlla orchite!
Sari-sù con l’augurà
a tucc quèi che hinn malaa
ona prèsta guarigion:
che stien ben, ma per de bon!

Ai amis, chi me conoss,
che sien bianch ò che sien ross,
de AUGURI en foo on monton:
on fettin de panatton,
on biccer de Malvasia,
dai brindèmm, e così sia!