L’è ona manera de dì, nò domà milanesa, per indicà che i temp hinn cambiaa, hinn pù quèi.
Quèsta manera de dì la gh’ha dedree ona bèlla storièlla che l’è quèsta: Enrico IV di Borbone con la soa miee Maria de’ Medici eren andaa in visita a Montegrotto e chì, ona paesanèlla, Berta, la s’è presentada denanz a la coppia real, la s’è ingenoggiada e l’ha regalaa a la Maria de’ Medici on remissèll de lin che l’aveva filaa la nòtt prima.
Per ringrazialla, i Reai gh’hann regalaa tanta tèrra quanta ne podeva recintà el fil. Quand el dì dòpo la gent l’ha savuu la stòria, hinn cors tutti con tanti regai per vègh ona quai ricompensa e l’è staa inscì che la Regina l’ha sentenziaa:” L’è pù el temp che Berta filava!”
Ma la vera stòria la dis che Berta l’era la miee de Pipino il Breve e mama de Carlo Magno, ma còssa la filass l’è minga daa de savè.
