El regall che voeuri incoeu
l’è “…tornà a vèss on fioeu…”
Rivedè la mia Milan
quèlla cont el coeur in man.
Rivedè i mè Navili
e i barcon sòtt’ai pontili
che scarlighen via ‘me l’òli
e viaggen in convòli.
Oh sì, ‘me me piaseria
sentì anmò giò per la via
el vosà d’on vègg strascee,
quèll di rann, el gelatee.
Vedè anmò i negoziant
e i garzon fà d’ aiutant;
la bottega del mornee,
di granaj, el fondeghee.
Sentì anmò i antigh odor
e ai poggioeu vedè tant fior;
la calada quand ch’el fiòcca
e trottà i cavai de scòcca;
el brumista sù a cassètta
e i donètt con la velètta.
Vedè anmò in gir i ciocch
el’omètt ch’el cerca i mocc
‘Dèss sèmm pien de giargianes,
marocchitt e de cines!
Ma indoe l’è la mia Milan
quèlla cont el coeur in man?
Gh’è restaa la Madonina
tutta d’òra anmò là in scima,
almen Lee la gh’è ancamò:
“Madonina, guarda giò!”
