El mè amis Roberto Marelli, in vun di trii liber del sò lunari el cunta che:
San Valentin l’è el Sant protettor di innamoraa e ‘l se festeggia el 14 de febrar, el dì che l’è staa martirizzaa a Roma per ordin de l’Imperador Claudio el Gòtich.
El patròno de l’amor l’è nassuu a Terni in del 170 d.c. e l’è staa ordinaa pret a vint ann e Vèscov a trenta.
De stòri su la vita de ‘sto Sant ghe n’è on badalucch, voeuna de quèsti la cunta che el Valentino el fudèss specializzaa in problèma de coeur e in de Lù ghe andaven sia i moros che i còppi in crisi de sentiment. L’era assee fà quatter ciaccer cont el Sant perché l’amor, come d’incant, el rifioriss; ai còppi che ritrovaven la pas e l’armonia, el Sant el ghe regalava on fior e par che ‘sto fior mai el saria diventaa pass.
La fèsta, a partì dal Medioevo, la gh’ha avuu on cèrto risalt perché se diseva che dal 14 de febrar, quand cominciava la primavera, i usèi cominciaven a cobbiass, e i moros a preparà el sò matrimòni; la fèsta de San Valentin la segnava el risveli de la natura e de l’amor.