sul sagraa del domm
sul sagraa del domm

Me ricòrdi, l’era bèll
quand mì seri anmò on pivèll
vedè lì in sul sagraa
tanti ròsc improvvisaa.

 

Discutteven sui duu pee
l’impiegaa, el perucchee,
el commèss, l’imprenditor
el pòr crist cont el gran scior.

Chi parlava in meneghin,
chi in lingua, per vèss fin,
chi parlava in giargianes,
ch’in toscan ò turines.

In on ròccol, de ballon
se discut: che confusion!
Milan, Inter, el Rivera,
el Mazzòla…che bèll l’era!

In on alter ròsc de borsa
se discut, poeu via de corsa
e se cambia argoment,
là gh’è in ball i falliment!

Ècco là, règna sovrana,
la politica ambrosiana:
“El Comun l’ha minga faa…”
“Sì, però l’ha progettaa…”

Salta sù ‘l democristian…
dis inscì el repubblican…
poeu ‘l parer del comunista…
ghe ribatt sècch el fascista!

Se va avanti per di or,
se discutt con tant fervor;
ma nissun cambia parer,
tant l’incoeu l’ è istèss d’ier.

Sì, lì pròppi sul sagraa
se scoltava i novità,
i notizzi del doman,
quèi bèi frèsch, de prima man.

Ma incoeu in sul sagraa
el spettacol l’è cambiaa:
gh’è i turista, i giappones,
gh’è pù nanca on milanes.

Tutti cont el cèll in man,
‘me di orlocch, ‘me di giavan,
‘dèss la gent la parla pù
paren tanti turlurù.

A la faccia del progrèss
cèrti ròbb i hann traa in del cèss!
‘Dèss gh’è ‘l twitter, l’effebi,
Cronos, Ansa, che soo mì…

Ma disee quèll che vorii
l’era mèj, seconda mì,
quand la gent in sul sagraa
la ghe ‘ndava per parlà.