la vedovella
la vedovella

Numm la ciamom “Vedovèlla”,
guai ciamalla fontanèlla,
a Milan l’è ‘na bestèma,
sì, per numm l’è ‘nca on’emblèma.

 

“Drago Verd” quaivun te ciama
ma l’è mèj on nòmm de dama:
Se pò piang cont on sorris
e pensall in Paradis.

Semper pronta a scoeud la set,
on ses’cent n’hann miss in ret;
semper frèsca, ciara e bòna,
de Milan te see gran dòna.

Quanto corr e giugattà…
rinfrescass quand s’è sudaa,
cont on did stoppatt la bocca
e sbilzà… sòtt’a chi tocca!

Numm t’èmm semper rispettada,
carezzada e coccolada,
me dispias doè dill chì
ma tutt quèst l’è ‘dree finì.

Gioventù senza rispètt,
clandestin che fa toalètt,
el drogaa poeu ghe n’ha minga
el ven lì per la siringa.

Vedovèlla èmm capii,
caragnà per el marì
l’è ‘na ròba natural
l’era nò per tì on gran mal.

‘Dèss però ‘l tò caragnà
l’è on gran sfògh de disperaa,
vedè in gir tutt ‘sto bordèll
e Milan che l’è pù quèll.


www.milanodavedere.it

www.facebook.com/separlamilanes