A vòlt, el ciappà vun per l’alter ovvero, a volte prende uno per l’altro. In altre parole, ci si confonde, si fa confusione.
Una cosa che può capitare a tutti, ma se succede come nella storiella che state per leggere, tutto diventa più… divertente.
Siete pronti a sorridere? Buona lettura
A vòlt, el ciappà vun per l’alter
Ona famiglia inglesa l’ha passaa i sò vacanz in Germania e, intanta che la faseva ona passeggiada, l’ha vist ona graziosa casètta de campagna.
L’ha domandaa de chi l’era e l’ha savuu ch’el proprietari l’era on pastor protestant. Hinn staa faa di trattativ, per fittàla per l’estaa de l’ann dòpo. Quand l’è tornada in Inghilterra, de colp, a la sciora, ghe ven in ment d’avè minga vist el WC e l’ha scrivuu al pastor per pregall de digh in doe ’l se troava.
Quand l’ha ricevuu la lettera, el pastor l’ha minga capii l’abbreviazion WC e credendo che se trattava de ona cappella de la sètta anglicana ciamada ’’Wall’s Chapel’’ , l’ha rispòst in ’sta manera:
’’Gentil sciora, hoo apprezzaa la soa richiesta e gh’hoo el piasè de informaLa che el loeugh al qual Le la se riferiss in de la Soa stimada lettera, el se troeuva a 12 chilòmetri de la cà, e quèst l’è on bèll fastidi, soratutt se la gh’ha l’abitudin de andagh de spèss e in ch’el caso chì l’è preferibil portass adree de mangià e restà lì in sul pòst tutt el dì.
Cèrti ghe vann a pee, di alter in tramm ò in biciclètta, ma riven semper in del moment giust e disturben minga. Gh’è pòst per 400 persònn settà-giò e 100 in pee, gh’è l’aria condizionada per evità l’inconvenient di cattiv odor daa de tutti chi persònn lì.
I sedil hinn de velù, se raccomanda domà de rivà in anticip per trovà i pòst de settass-giò; i fioeu se setten-giò vesin ai sò gent e se voeuren, pòden anca cantà in còr.
Quand se va denter, ven daa on foeuj de carta a ògnidun, e i persònn che riven, quand la distribuzion l’è finida, podarann doprà anca el foeuj del vesin, però quand vann foeura, dovarann dall indree, possibilment minga riscïaa, per podèll poeu utilizzà tutt el mes.
Gh’è di fotògrafi specializzaa che ciappen fotografii in di divèrs pòs, che vègnen poeu pubblicaa sui giornai de la città in manera che tucc pòden vedè con piasè i vari persònn intanta che fann on’azion tanto umana. Tanti salut.’’
